Во Охрид денеска се очекува дипломатска средба на највисоко ниво меѓу Македонија и Хрватска, во рамки на официјалната посета на хрватскиот премиер.
На аеродромот „Св. Апостол Павле“ во Охрид, премиерот Христијан Мицкоски ќе го пречека својот хрватски колега Андреј Пленковиќ, со што ќе започне програмата на разговори и официјални средби.
По свечениот пречек, предвидено е двајцата премиери да одржат тет-а-тет разговор, кој потоа ќе продолжи и во поширок формат со двете владини делегации. Средбите се фокусирани на унапредување на билатералните односи и продлабочување на соработката во повеќе стратешки области.
Еден од клучните моменти на посетата ќе биде потпишувањето на договори за стратешко партнерство меѓу двете држави, како и меморандум за соработка во енергетскиот сектор. Посетата ќе биде заокружена со заедничка прес-конференција и бизнис-форум, на кој ќе се сретнат компании од двете земји, со цел поттикнување на економските врски и нови инвестиции.
…
