Извор: Dnevnik.hr
САД не ја одобриле визата за рускиот заменик-министер за надворешни работи Александар Алимов, кој требало да присуствува на седница на Советот за безбедност на Обединетите нации во Њујорк. Информацијата ја соопшти рускиот амбасадор во ОН, Василиј Небензја, за време на состанок со кој претседаваше кинескиот министер за надворешни работи Ванг Ји.
Според Небензја, и покрај повеќекратните обиди од руската страна да се добие дозвола за патување, американските власти на крајот ја одбиле апликацијата за виза. Тој оцени дека ваквиот потег претставува прекршување на обврските на САД како земја-домаќин на седиштето на Обединетите нации во Њујорк. Тој додаде дека одлуката е несоодветна и во однос на кинеското претседавање со седницата, како и на темата на состанокот, кој бил посветен на Повелбата на ОН.
Алимов, кој кон крајот на 2025 година беше назначен за заменик-министер за надворешни работи во тимот на Сергеј Лавров, претходно долги години работеше во руското МНР. Од 1993 година бил дел од дипломатската служба, а раководел и со секторот за мултилатерална хуманитарна соработка и културни врски.
Според негови претходни изјави за руски медиуми, Москва смета дека во меѓународните форуми сè почесто се наметнува темата за Украина, што, како што тврди, предизвикува замор кај дел од членките на Обединетите нации.
Овој случај не е изолиран. Во последниот период руските претставници неколкупати реагираа дека нивните делегации се соочуваат со потешкотии при добивање визи за учество на настани во Њујорк.
Претходно, Небензја тврдеше дека САД одбиле влезна виза и на друг руски делегат кој требало да присуствува на седница на Комитетот за информации на Генералното собрание на ОН. Во март годинава, пак, без американска виза останал и Леонид Слуцки, претседател на Комитетот за меѓународни работи на руската Државна дума, кој бил дел од официјална делегација што планирала патување во САД.
…
