Извор: Index.hr
Во голема координирана акција на европските и италијанските истражни органи, заврши истрагата под кодно име „Небула“, во која се разоткри мрежа осомничена за масивна даночна измама што ја оштетила Италија за повеќе од 78 милиони евра преку неплатен ДДВ.
Според информациите на Европско јавно обвинителство (EPPO), во Италија се приведени лица кои се сметаат за клучни фигури во криминалната структура, заедно со нивни блиски соработници. Дел од нив биле веднаш изведени пред судија, согласно новите процедури во италијанското кривично законодавство, кој требало да оцени дали ќе се издадат формални налози за притвор.
Истражителите соопштуваат дека двајцата главни организатори веќе се зад решетки, додека уште четворица од уапсените се ставени во домашен притвор. Дополнително, на двајца осомничени им се изречени мерки на претпазливост – меѓу кои редовно јавување во надлежните служби и забрана за каква било деловна активност.
Вкупно седум лица се опфатени со судски налози за апсење, кои биле спроведени во последната фаза од операцијата. Осмиот осомничен, според истрагата, успеал да ја напушти Италија пред да биде лишен од слобода.
Целата шема, како што наведуваат истражителите, функционирала преку добро организирана мрежа на компании распространети меѓу Италија и Хрватска. Преку неа се набавувала електронска и хигиенска стока од големопродажни италијански фирми без пресметан ДДВ, по што истата формално се препродавала преку низа посреднички и фиктивни компании, вклучително и фирми со седиште во Неапол, со што даночните обврски целосно се избегнувале.
Во следната фаза, стоката завршувала кај компании кои повторно ја пласирале на пазарот, овојпат без да го платат данокот кој законски би требало да биде наплатен. На тој начин, според обвинителството, се создавал затворен круг на трансакции чија единствена цел била прикривање на вистинските текови на парите и избегнување на даночни обврски.
За да ја отежнат работата на истражителите, осомничените наводно често ги менувале фирмите што ги користеле во шемата, регистрирајќи ги на имиња на лица без реална финансиска или имотна позадина, со што се обидувале да го замаглат вистинското сопствеништво и контрола.
И покрај обемот на наводните злоупотреби, од ЕPPO потсетуваат дека сите вклучени лица се сметаат за невини додека нивната вина не биде докажана пред надлежните судови во Италија и Хрватска.
…
