САД, според израелски медиуми, извршиле значајно засилување на своето воено присуство во Израел, распоредувајќи борбени авиони Ф-22 и голем број авиони-танкери на повеќе стратешки локации. Потегот, кој локалните извештаи го опишуваат како без преседан, доаѓа во период на кревка регионална стабилност, и покрај неодамнешниот прекин на огнот со Иран.
Израелската телевизија КАН пренесува дека американските сили нема намера да го намалат своето присуство на Блискиот Исток во блиска иднина, со планови да останат распоредени најмалку до крајот на годината. Сателитски снимки наводно покажуваат дека дел од Ф-22 е стациониран во воздухопловната база Овда на југот на земјата, додека танкер-авиони се распоредени и на клучните цивилни аеродроми „Бен Гурион“ и „Рамон“.
Зголемената воена активност веќе има директно влијание врз редовниот авио-сообраќај, при што цивилните операции се одвиваат под засилени ограничувања. Израелските власти предупредуваат дека „Бен Гурион“ сè повеќе функционира во услови слични на воена база, што дополнително ја усложнува ситуацијата.
Во такви околности расте загриженоста дека нарушениот баланс меѓу воените и цивилните потреби би можел да ја загрози претстојната туристичка сезона, како и да ги обесхрабри странските авиокомпании од проширување или воведување нови линии кон Израел.
…
