Премиерот Христијан Мицкоски денеска од собраниската говорница најави можност за намалување на цената на електричната енергија за граѓаните, истакнувајќи дека Владата работи на нов енергетски модел кој треба да обезбеди постабилен и поевтин систем.
На седницата за пратенички прашања, Мицкоски посочи дека реформската агенда се реализира според планираното и дека државата има потенцијал да биде меѓу водечките земји во евроинтегративниот процес.
– Имаме амбициозна агенда и сакаме да покажеме дека имаме капацитет да ги спроведеме реформите дома – изјави премиерот, додавајќи дека до крајот на јуни треба да бидат финализирани дел од обврските предвидени во акцискиот план.
Во делот на енергетиката, тој откри дека Владата, во координација со Европската комисија, подготвува измени во Законот за енергетика кои би можеле да донесат намалување на цената на струјата од 5 до 10 проценти.
Според Мицкоски, од 1 јануари 2027 година ЕСМ нема да обезбедува повеќе од 70 проценти од потребите на снабдувачот, со што ќе се создадат услови за пофлексибилен и поконкурентен пазар.
Тој објасни дека новиот модел ќе се базира на различна потрошувачка во текот на денот и сезоните, при што ќе се искористуваат периодите кога производството од обновливи извори, особено од соларните капацитети, овозможува значително пониски цени.
– Во одредени часови струјата од соларните капацитети има речиси нулта, па дури и негативна цена. Целта е да создадеме вин-вин модел и за системот и за граѓаните – нагласи премиерот.
Тој додаде дека најголем дел од мерките од реформската агенда се во завршна фаза, додека Изборниот законик останува прашање за кое е потребен политички консензус.
…
