Италијанската влада соопшти дека повеќе од 200 милиони евра запленети од мафијашки структури ќе бидат пренаменети за зајакнување на безбедноста на железничкиот систем во земјата.
Средствата биле откриени во голема меѓународна истрага на италијанските финансиски и судски власти, кои со години ја следеле мрежата на тајни инвестиции поврзани со мафијата во различни земји и бизнис сектори.
Според истрагата, парите биле сокривани преку даночни раеви и инвестирани во банки, луксузни хотелски синџири, криптовалути и други легални бизниси низ Европа.
Истражителите тврдат дека капиталот бил поврзан со Матео Месина Денаро, еден од најпознатите водачи на сицилијанската мафија, кој преку мрежа на посредници ги вложувал средствата во легални компании.
Во операцијата учествувале институции од повеќе земји, меѓу кои Андора, Гибралтар, Кајманските Острови, Луксембург, Монако, Швајцарија и Шпанија.
Италијанските власти најавија дека запленетите средства ќе бидат насочени кон проекти за јавна безбедност, со посебен акцент на железничките станици и заштитата на патниците.
