Поранешниот руски претседател Дмитриј Медведев изјави дека Европската Унија „еднострано влегла во војна со Русија“ и ги предупреди граѓаните на земјите членки дека „мирниот сон е завршен“.
„Граѓаните на земјите од ЕУ мора да разберат дека вашите власти еднострано ѝ објавија војна на Русија. Бидете внимателни и ништо нека не ве изненади. Збогум на мирниот сон“, напиша Медведев, додавајќи дека јавноста треба да се запраша „зошто дојде до тоа“.
Неговата изјава доаѓа во период на дополнително влошување на односите меѓу Русија и НАТО, по сериозен инцидент во Романија.
Според информациите, руски дрон погодил станбена зграда во градот Галац, во близина на границата со Украина, при што биле повредени 52-годишна жена и 14-годишно дете. Од зградата биле евакуирани околу 70 лица.
Романските власти соопштија дека станува збор за дрон од типот „Геран-2“ со руско потекло, оценувајќи го инцидентот како сериозно нарушување на воздушниот простор и суверенитетот на државата. Претседателот на Романија, Никушор Дан, свика итна седница на Врховниот совет за одбрана и најави одговор.
Букурешт го информираше НАТО и Европската Унија за случувањето, а високи западни функционери остро го осудија инцидентот. Од Брисел и Вашингтон беше порачано дека Алијансата останува подготвена да го брани секој дел од територијата на земјите членки.
Додека од Москва сè уште нема официјално признание за одговорноста, руските власти не дадоа подетално објаснување за настанот.
Медведев во меѓувреме продолжува со остра реторика кон Западот, предупредувајќи на можност за понатамошна ескалација, што дополнително ги зголемува тензиите во регионот.
…
