Романските вооружени сили немале доволно време да реагираат и да го соборат рускиот дрон кој ноќта удри во станбена зграда во градот Галац, потврдија претставници на романското Министерство за одбрана на прес-конференција одржана по инцидентот што предизвика загриженост во Романија и во НАТО.
Бригадниот генерал Георге Максим изјави дека постоеле и законски и оперативни ограничувања кои ја отежнале можноста за навремена интервенција.
„Првото ограничување е правно, бидејќи не можеме да отвориме оган на начин што би можел да влијае врз воздушниот простор на соседна држава. Дополнително, за дејствување против воздушна цел е потребно време за детекција, идентификација и борбена реакција. Четирите минути што ги имавме на располагање беа исклучително кратки“, изјави Максим.
Тој посочи дека дел од романските системи за противвоздушна одбрана биле проектирани пред масовната појава на напади со беспилотни летала и дека во тек е нивна модернизација.
„Имаме копнени системи за противвоздушна одбрана што се развиени пред 2023 година, кога започна оваа војна со дронови. Романија континуирано работи на нивно унапредување и приспособување на новите закани“, истакна генералот.
На новинарско прашање дали интересите на Украина имаат предност пред одбраната на романската територија, Максим нагласи дека армијата постапува исклучиво согласно романските закони и националните безбедносни процедури.
Тој додаде дека Министерството за одбрана веќе работи на измени во законската рамка со цел во иднина да се овозможи побрза и поефикасна реакција во вакви ситуации.
„Постојат ограничувања во употребата на оружје и средства против дронови кога тие се наоѓаат во воздушниот простор на друга држава. Работиме на приспособување на законодавството за да ги намалиме ваквите ризици“, рече Максим.
Романските власти потврдија дека дронот кој удрил во станбената зграда во Галац бил од типот „Геран-2“, руска верзија на иранскиот „Шахед-136“, кој Москва масовно го користи во нападите врз Украина.
Според првичните информации, целото експлозивно полнење на леталото детонирало при ударот во зградата. Во инцидентот биле повредени две лица, кои се здобиле со полесни повреди и им била укажана медицинска помош.
На местото на настанот увид вршат специјализирани тимови од Министерството за одбрана, Министерството за внатрешни работи и романската разузнавачка служба, кои ги утврдуваат сите околности околу инцидентот.
„Геран-2“ е таканаречен камиказа-дрон за еднократна употреба, долг околу 3,5 метри со распон на крилјата од 2,5 метри и способен да носи експлозивна боева глава тешка неколку десетици килограми. Поради ниската цена и едноставната конструкција, овие летала станаа едно од главните оружја во руските напади врз украинската инфраструктура.
Романското Министерство за одбрана остро го осуди инцидентот и оцени дека станува збор за сериозна закана за безбедноста на регионот на Црното Море.
„Овие неодговорни постапки на Руската Федерација претставуваат закана не само за безбедноста на романските граѓани, туку и за колективната безбедност на НАТО“, соопшти Министерството.
Инцидентот предизвика и реакции од европските и евроатлантските институции. Претседателката на Европската комисија, Урсула фон дер Лајен, оцени дека Русија „преминала уште една линија“, изразувајќи целосна солидарност со Романија.
Од НАТО порачаа дека внимателно ја следат ситуацијата и ќе продолжат да ја зајакнуваат одбраната од заканите што доаѓаат од беспилотни летала. Портпаролката на Алијансата, Алисон Харт, соопшти дека генералниот секретар Марк Руте е во постојан контакт со романските власти.
Инцидентот повторно ја отвори дебатата за безбедноста на источните граници на НАТО, особено по серијата случаи во кои руски дронови навлегуваа или се уриваа на територијата на земји членки на Алијансата.
