Романија се соочи со најсериозниот инцидент на своја територија поврзан со руската војна во Украина, откако руски дрон удри во станбена зграда во градот Галац, во близина на украинската граница, предизвикувајќи експлозија, пожар и повреди на цивили.
Според романските власти, беспилотното летало било идентификувано како руски дрон од типот „Геран-2“, руската верзија на иранскиот „Шахед-136“, кој Москва масовно го користи во нападите врз украинска инфраструктура и населени места.
Според локалните медиуми и очевидци, дронот удрил во зградата со огромна сила, пробивајќи неколку ката пред да експлодира во еден од становите. Снимките направени непосредно по ударот покажуваат како пламен ги зафаќа горните катови од објектот, додека експлозијата предизвикала значителна материјална штета и на соседните згради. Локални новинари јавуваат дека ударниот бран искршил прозорци и на станбен блок кој се наоѓал од другата страна на улицата. Според романските медиуми, само благодарение на среќни околности нема загинати.
Во инцидентот се повредени 52-годишна жена и нејзиното 14-годишно дете. Двајцата биле повредени додека се обидувале да избегаат низ ходникот во кој избувнал пожар по експлозијата.
Жената се здобила со изгореници од прв и втор степен на стапалата и со повеќе полесни повреди, по што била хоспитализирана. Лекарите соопштија дека нејзиниот живот не е загрозен.
„52-годишна жена беше примена со изгореници и абразии. Таа е свесна и стабилна. Повеќе е загрижена за своето дете отколку за сопствената состојба“, изјави д-р Корина Попазу од болницата во Галац.
Четиринаесетгодишното дете исто така било пренесено во Детската болница во Галац, каде што е под медицински надзор. И детето е свесно и во стабилна состојба.
Романското Министерство за одбрана потврди дека дронот навлегол во романскиот воздушен простор за време на нов бран руски напади врз украински цели долж реката Дунав. По детектирањето на леталото, романските воздухопловни сили подигнале два борбени авиони Ф-16 од базата Фетешти, но според воените власти немало доволно време за пресретнување.
Бригадниот генерал Георге Максим изјави дека војската располагала со само четири минути за реакција.
„Потребно е време за детекција, идентификација и борбено дејствување. Четирите минути што ги имавме беа исклучително кратки“, изјави Максим.
Тој додаде дека дел од романските противвоздушни системи биле развиени пред масовната појава на закани од дронови и дека во тек е нивна модернизација.
Дополнителна загриженост предизвика информацијата дека на романска територија е пронајден уште еден дрон. Според државната телевизија на Романија, второто беспилотно летало не експлодирало и моментално е предмет на истрага од страна на безбедносните служби.
Инцидентот предизвика силни реакции од НАТО и Европската Унија.
Генералниот секретар на НАТО, Марк Руте, изјави дека Алијансата е целосно солидарна со Романија и дека ќе продолжи да ја зајакнува одбраната од закани, вклучително и напади со дронови.
„НАТО е подготвен да го брани секој сантиметар од територијата на сојузниците“, порача Руте.
Претседателката на Европската комисија, Урсула фон дер Лајен, оцени дека Русија „преминала уште една линија“, нагласувајќи дека Европската Унија стои зад Романија и ќе продолжи да го зголемува притисокот врз Москва.
Романските власти го осудија нападот како сериозна и неодговорна ескалација, оценувајќи дека ваквите инциденти претставуваат директна закана за безбедноста на граѓаните на земја членка на НАТО и Европската Унија.
Истражните тимови и натаму работат на местото на настанот, а според првичните проценки станува збор за најсериозниот инцидент со руски дрон на романска територија од почетокот на руската инвазија врз Украина.
