Парковите во Општина Центар од 2 до 13 јуни ќе се претворат во кино сали под отворено небо, каде децата, младите и семејствата ќе можат бесплатно да уживаат во филмски проекции и забавни содржини.
Како што информираат од Општина Центар, проекциите ќе започнуваат секоја вечер од 20 часот и ќе се одржуваат на повеќе локации низ општината во рамките на проектот „Патувачко кино“.
Градоначалникот Горан Герасимовски истакна дека целта на проектот е преку филм, дружење и забава на најмладите да им се понуди поинакво културно и едукативно искуство во нивното секојдневие.
За потребите на проектот е подготвен специјален македонски детски филм составен од повеќе кратки приказни. Преку нив децата ќе имаат можност да учат за другарството, почитта, културата на однесување и важноста на секојдневните навики кои можат да направат голема разлика во општеството.
Од Општина Центар најавуваат дека за секое дете ќе бидат обезбедени бесплатни пуканки и сокче, со што кино-вечерите ќе добијат дополнителна празнична атмосфера.
Првата проекција е закажана за вторник, 2 јуни, во паркот во Капиштец, а во наредните денови киното ќе патува низ повеќе паркови и населби во општината.
Проектот има за цел да ја доближи културата до граѓаните и да создаде нови можности за семејна забава и квалитетно поминато време на отворено во текот на летниот период.
Со оваа иницијатива, Центар повторно станува место каде културата излегува надвор од институциите и доаѓа директно меѓу граѓаните, носејќи филмска магија под ѕвезденото небо.
