Општина Новаци влегува во нов развоен циклус вреден околу 1,2 милиони евра, кој опфаќа изградба на индустриска зона, нова патна инфраструктура и дополнителни капитални инвестиции насочени кон економски развој и отворање нови работни места.
Ова денеска го истакна заменик-претседателот на Владата и министер за транспорт Александар Николоски при посетата на општината, нагласувајќи дека проектите се реализираат со поддршка од Владата, буџетот на Општина Новаци и програмите на Светска банка.
Според Николоски, во индустриската зона се инвестираат околу 40 милиони денари со владина поддршка, а дополнителни средства обезбедува и локалната самоуправа. Целта е создавање современа бизнис-зона која ќе привлече нови инвестиции и ќе обезбеди работни места не само за жителите на Новаци, туку и за поширокиот пелагониски регион.
Тој нагласи дека инфраструктурата околу индустриската зона веќе е завршена, а во моментов се работи на изградба на внатрешната инфраструктура. Воедно, информираше дека веќе започнала изградбата на првите две фабрики од лесната незагадувачка индустрија.
„Сите парцели се продадени, а најавени се и нови инвестиции кои ќе се реализираат во следниот период“, изјави Николоски.
Покрај индустриската зона, во Новаци се реализира и посебен инфраструктурен проект со поддршка од Светска банка, преку кој се инвестираат дополнителни 520.000 евра за реконструкција и изградба на улици низ општината.
Министерот најави дека до крајот на годината Владата ќе поддржи уште еден до два нови проекти кои веќе се подготвени од локалната самоуправа, а кои ќе бидат финансирани надвор од редовните општински средства.
Тој посочи дека заедно со изградбата на автопатот Прилеп-Битола, на кој интензивно се работи, овие инвестиции ќе придонесат за целосно економско заживување на Општина Новаци и создавање подобри услови за живот и работа на граѓаните.
Николоски порача дека Владата ќе продолжи да ја поддржува општината во реализацијата на проекти кои носат развој, нови инвестиции и отворање работни места.
