Триесет и петгодишен жител на Росоман е приведен од полицијата откако во алкохолизирана состојба го нарушил јавниот ред и мир, физички нападнал 18-годишно момче и претходно објавувал содржини со заканувачки карактер кон градоначалникот на општината, информира Министерството за внатрешни работи.
Според информациите, на 31 мај околу 00:40 часот, полициски службеници од Одделението за внатрешни работи Кавадарци го лишиле од слобода И.А. (35) од Росоман. Тој бил затекнат на улицата „Пролетерска“, каде се однесувал агресивно, дрско и непристојно, а притоа не ги почитувал наредбите на полициските службеници при извршување на нивните службени задачи.
Во текот на постапувањето било утврдено и дека претходно во угостителски објект во Росоман физички го нападнал Л.Л. (18) од селото Паликура. Според пријавата, при нападот употребил стаклен предмет, при што му нанел повреди на младото лице.
По извршениот алкотест, полицијата утврдила дека приведениот бил под дејство на алкохол, при што му биле измерени 1,03 промили алкохол во крвта.
Од МВР дополнително соопштија дека против истото лице веќе била водена постапка. На 30 мај со него бил извршен службен разговор по пријава дека од април годинава преку социјална мрежа објавувал содржини насочени кон градоначалникот на Општина Росоман, Ѓ.К. (37), со што кај него предизвикал чувство на страв и загрозеност.
За двата случаи е известен надлежен јавен обвинител, а по нивното целосно расчистување и документирање против осомничениот ќе бидат поднесени соодветни кривични и прекршочни пријави.
Надлежните институции продолжуваат со преземање мерки за целосно утврдување на сите околности поврзани со инцидентите.
