Украинскиот претседател Володимир Зеленски откри дека официјално побарал од Соединетите Американски Држави дозвола за производство на ракетите за противвоздушниот систем „Патриот“ на украинска територија, оценувајќи дека тоа би било од голема корист не само за Украина, туку и за другите сојузници на Вашингтон.
Во објава на социјалните мрежи, Зеленски соопшти дека испратил писмо до Белата куќа и до американскиот Конгрес, надевајќи се на позитивен одговор од актуелната американска администрација.
„Испратив писмо до Белата куќа и до Конгресот на САД. Се надевам дека ќе покажат разбирање и ќе одговорат. Ова го побарав и од претходната американска администрација, а истото го барам и од сегашната“, напиша Зеленски.
Според него, можноста Украина да произведува ракети за системот „Патриот“ би претставувала значајно зајакнување на одбранбените капацитети на земјата во услови на континуирани руски воздушни напади.
Украинскиот лидер истакна дека ваквиот чекор би можел да има пошироко значење и за други региони во светот.
„Тоа ќе ни помогне нам. Ќе му помогне и на Блискиот Исток, како и на секоја друга држава на која Соединетите Држави ќе одлучат да ѝ помогнат. Сè додека не произведеме европски систем за противракетна одбрана, ќе ни биде потребна поддршка од САД“, порача Зеленски.
Тој истовремено соопшти и дека Германија испорачала нов лансирен систем од современиот противвоздушен систем IRIS-T, кој веќе е ставен на располагање на украинските вооружени сили.
Системите „Патриот“ и IRIS-T во моментов се меѓу најважните компоненти на украинската воздушна одбрана и играат клучна улога во пресретнувањето на балистички ракети, дронови и други воздушни закани.
Барањето на Зеленски доаѓа во период кога Украина интензивно работи на зајакнување на сопствената воена индустрија и намалување на зависноста од увоз на вооружување и воена опрема од странство.
