Триесет и петгодишен жител на Росоман е приведен од полицијата по два одвоени инциденти, меѓу кои нарушување на јавниот ред и мир, физички напад и пријави за закани кон градоначалникот на општината.
Според информациите од Министерството за внатрешни работи, И.А. бил лишен од слобода во раните утрински часови на 31 мај, откако во видно алкохолизирана состојба на улица во Росоман се однесувал агресивно и одбивал да постапи по наредбите на полициските службеници. При извршеното алкотестирање кај него биле измерени 1,03 промили алкохол во крвта.
Покрај тоа, против истиот е поднесена пријава и поради физички напад во угостителски објект, каде што со стаклен предмет повредил 18-годишно лице.
Од МВР информираат дека ден претходно, на 30 мај, со него бил извршен службен разговор по пријава дека во периодот од април годинава преку социјална мрежа објавувал содржини насочени кон градоначалникот на Општина Росоман, со што кај пријавителот предизвикал чувство на страв и загрозеност.
За двата случаи е известен јавен обвинител, а по нивното целосно документирање ќе бидат поднесени соодветни пријави.
…
