Основниот суд во Куманово изрече казна затвор од седум и пол години за Вангелица Илијевска, откако таа го призна делото за убиство на својот сопруг и свекор во настан кој се случи во јуни 2024 година.
Во текот на денешното рочиште, Основното јавно обвинителство изврши преквалификација на делото од „убиство“ во „убиство на миг“, по член 125 од Кривичниот законик, по што обвинетата ја прифати вината.
Според образложението на обвинителството, психијатриското вештачење покажало дека Илијевска дејствувала во состојба на силна раздразливост и афект, кој бил поттикнат од претходен напад и долгогодишна семејна напнатост, што влијаело врз нејзината психичка состојба во моментот на извршување на делото.
Судијата од Основниот суд Куманово во образложението нагласи дека се работи за тежок и трагичен случај со две изгубени животи, но дека судот ги зел предвид и олеснителните околности, вклучително и признанието на вина и околностите наведени од одбраната.
Одбраната на Илијевска посочи дека таа подолг период била изложена на семејно насилство, за што биле приложени и докази од надлежни институции, како и дека е мајка на две малолетни деца и претходно не била осудувана.
Судот одлучи во казната да се пресмета и времето поминато во куќен притвор, а мерката притвор останува на сила до правосилноста на пресудата.
По изрекувањето на пресудата, во судницата имаше реакции на незадоволство, а самата обвинета, според присутни, ја примила одлуката со емоции и плач.
…
