Со осум концерти и учесници од 12 земји, вечерва во Скопје започнува јубилејното 25. издание на ОФФест, кое ќе трае до 6 јуни. Годинава фестивалот е во знакот на африканската музика и култура.
Фестивалот ќе биде отворен во Националната опера и балет со настапот на триото „Guitari Baro“ од Гвинеја и Мали, по што ќе следува концерт на јужноафриканската група BCUC.
Директорот на фестивалот Оливер Белопета истакна дека и годинава остануваат верни на препознатливиот концепт на ОФФест – внимателно селектирана програма со врвни имиња од светската музичка сцена. „Направивме поширок пресек на современата африканска музика и ги обединивме различните региони на континентот во една фестивалска приказна“, рече Белопета.
Во наредните денови ќе настапат Нилс Окланд, „Добрила и Доријан“, Раул Рефри и Марија Мазота, како и „Les Amazones d’Afrique“. Завршната вечер во МКЦ ќе донесе настапи на Мачуме Занго и „Zawose Queens“, а на програмата е и документарниот филм „Elis & Tom – It Had to Be You“.
Организатор на фестивалот е Скопскиот џез фестивал, а покровител е Министерството за култура и туризам, кое годинава го поддржа ОФФест со 2,4 милиони денари.
…
