Народната банка на Северна Македонија треба да добие законски механизми за ограничување на банкарските надоместоци и подобра заштита на корисниците на платежни услуги, смета гувернерот Трајко Славески.
Славески повика на преиспитување на законската рамка со цел централната банка да може да влијае врз висината на банкарските такси. Тој вели дека вакви решенија постојат и во повеќе европски земји и можат да послужат како пример.
Според него, плаќањата и платниот промет се услуги што граѓаните и компаниите ги користат секојдневно, па затоа надоместоците треба да бидат предмет на поширока јавна и институционална дебата.
„Во овој момент Народната банка нема законска основа директно да ги регулира таксите на банките. Но, актуелните случувања покажуваат потреба од надополнување на законската рамка по пример на европските практики,“ изјави Славески.
Тој додаде дека во многу европски држави постојат механизми за регулирање или ограничување на банкарските надоместоци со цел заштита на потрошувачите и обезбедување фер услови.
Иницијативата доаѓа по неодамнешните одлуки на дел од банките во земјава за зголемување на надоместоците за платен промет, што предизвика реакции во јавноста и дебата за заштита на корисниците.
…
