Четворица странски земјоделски работници загинаа во Италија откако нивното возило било запалено во близина на бензинска станица во местото Амедолара. Италијанската полиција уапси двајца пакистански државјани под сомнение за тешко убиство.
Според истрагата, меѓу жртвите има тројца државјани на Авганистан и еден од Пакистан, а еден авганистански работник преживеал и е клучен сведок. Тој се извлекол од запалениот автомобил кршејќи прозорец.
Истражителите наведуваат дека снимки од надзорни камери покажуваат две лица кои го блокирале возилото однадвор, по што во него била истурена запалива течност и избувнал силен пожар. Осомничените потоа побегнале од местото на настанот.
Преживеаниот сведок изјавил дека тој и загинатите работници работеле на берба на јагоди и дека ги превезувале истите лица кои сега се осомничени. Според неговото сведочење, конфликтот избувнал поради спорови околу исплата на дневници и дополнителни трошоци за превоз, по што ситуацијата ескалирала.
Тој додал дека имало и закани и притисоци поврзани со работните услови и исплатата. Италијанските власти проверуваат дали случајот е дел од пошироки проблеми со експлоатација и конфликти меѓу земјоделски работници во јужна Италија, додека обвинителството во Кастровилари ја води истрагата врз основа на видео-докази.
…
