Европската комисија препорачува постепено укинување на привремените гранични контроли во рамките на Шенген зоната, со цел враќање на слободното движење меѓу земјите членки, пренесуваат европските институции.
Според Комисијата, повеќе држави од ЕУ, меѓу кои Германија, Австрија, Франција, Италија, Холандија, Данска, Шведска, Словенија и Норвешка во изминатите години воведоа привремени контроли на внатрешните граници поради безбедносни предизвици и миграцискиот притисок. Иако ваквите мерки се дозволени во исклучителни околности, Брисел укажува дека тие треба да останат временски ограничени.
Во Германија, контролите на сите копнени граници се воведени од септември 2024 година и веќе неколкупати се продолжени, а последното продолжување важи до средината на септември 2026 година.
Европскиот комесар за миграција, Магнус Брунер, изјави дека бројот на нелегални преминувања на границите е намален за околу 40 проценти, што, според него, ја подобрува безбедносната состојба во Унијата.
Од Европската комисија порачуваат дека ЕУ веќе развива современи системи за управување со границите, кои треба да им овозможат на земјите постепено да се откажат од внатрешните контроли. Меѓу алтернативите се наведуваат засилени полициски проверки, мобилни биометриски системи и напредни технологии за следење.
Иако не е утврден конкретен рок за целосно укинување на контролите, Комисијата нагласува дека тие вообичаено не би требало да траат подолго од две години, освен во исклучителни ситуации.
…
