Поранешниот градоначалник на Карпош и поранешен директор на Царинската управа, Стефан Богоев, е опфатен во акцијата на Финансиската полиција за сомнежи поврзани со повеќе кривични дела од областа на финансиски криминал и корупција, потврди премиерот Христијан Мицкоски.
Мицкоски, одговарајќи на новинарски прашања, изјави дека истрагата е во тек и дека не сака да открива детали за да не се компромитира постапката. „Станува збор за лице кое е поранешен градоначалник на општина и поранешен директор на јавна институција, во конкретниот случај Царинската управа. Во постапката се опфатени и неколку вработени, како и едно лице кое било посредник во дејствија со елементи на незаконитост“, рече тој, нагласувајќи дека ја почитува презумпцијата на невиност.
Тој додаде дека истрагата може да се проширува и дека во наредниот период се можни нови слични акции во повеќе институции, повикувајќи се на наводни индиции од ревизорски извештаи за злоупотреби од минатото.
Од Управата за финансиска полиција информираат дека акцијата произлегува од предистражна постапка за повеќе кривични дела поврзани со злоупотреба на службена положба и стекнување противправна имотна корист од големи размери. Во рамки на акцијата биле извршени претреси на повеќе локации и повеќе лица се лишени од слобода, по насоки на надлежен јавен обвинител и судија на претходна постапка.
Истрагата, како што наведуваат надлежните, е сè уште во тек и се очекува понатамошно утврдување на сите околности и евентуална одговорност на вклучените лица.
…
