Повеќе од 367 тони небезбедна храна од животинско и неживотинско потекло биле спречени да се најдат на македонскиот пазар во текот на 2024 и 2025 година, соопшти директорот на Агенцијата за храна и ветеринарство (АХВ), Оливер Миланов, на одбележувањето на 15-годишнината од постоењето на институцијата и Светскиот ден на безбедноста на храната.
Миланов истакна дека безбедната храна е основно право на секој граѓанин и нагласи дека заштитата на здравјето на потрошувачите останува врвен приоритет на институцијата.
Според податоците што ги презентираше, АХВ во текот на минатата година спровела повеќе од 47.200 инспекциски надзори, при што биле изречени 6.770 инспекциски мерки за утврдени неправилности.
Тој посочи дека од формирањето на Агенцијата во 2011 година, институцијата континуирано работи на развој на модерен и ефикасен систем за контрола на храната, здравствената заштита и благосостојбата на животните, во согласност со европските стандарди.
Во делот на инспекциските контроли, Миланов информираше дека во 2024 и 2025 година биле спречени да влезат во промет повеќе од 80 тони храна од неживотинско потекло и над 287 тони храна од животинско потекло. Дополнително, како небезбедни биле вратени 16 пратки со храна од животинско потекло на граничните премини, а три пратки биле уништени.
Во исто време, биле забранети девет пратки со храна од неживотинско потекло, додека 90 тони увозна храна од оваа категорија биле нештетно уништени.
Директорот на АХВ нагласи дека институцијата посветува особено внимание и на спречувањето измами со храна, како што се погрешно означување на производите, лажно декларирање на потеклото и неточно претставување на составот на храната.
Покрај безбедноста на храната, значаен дел од работата на АХВ е насочен и кон здравствената заштита на животните. Според Миланов, преку континуирано спроведување на националните програми за превенција, контрола и искоренување на заразни болести, успешно се одржува високо ниво на заштита на животните и јавното здравје.
…
