Од 1 август граѓаните ќе се соочат со ново зголемување на банкарските провизии, при што дел од услугите поскапуваат и над 30 отсто. Најновите измени на тарифниците што ги најавија дел од поголемите банки во земјава опфаќаат низа секојдневни банкарски услуги.
Најизразено зголемување има кај плаќањето сметки на шалтер, каде што провизијата се зголемува од 90 на 120 денари по трансакција. Ова директно ќе ги засегне граѓаните кои не користат дигитално банкарство, особено пензионерите и повозрасната популација.
Поскапувања се воведуваат и кај сметките за пензионери, каде месечните надоместоци растат од 20 на 25 денари за основните пакети, односно од 30 на 35 денари за повисоките. Дополнително, се зголемуваат и трошоците за девизните сметки, кои ќе се наплатуваат по 35 денари месечно по валута, наместо досегашните 30.
Промени има и кај станбените кредити, каде се воведува нова еднократна провизија од 1 до 1,5 отсто од износот на кредитот. Во зависност од условите, овој трошок може да достигне и до 60.000 денари, што претставува значително финансиско оптоварување за кредитокорисниците.
Зголемени се и надоместоците за меѓународни плаќања, вклучувајќи СВИФТ и СЕПА трансфери, како и провизиите за користење дигитално банкарство и картични услуги. Дел од банките воведуваат и нови месечни и еднократни трошоци за електронски сервиси, иако во последните години токму тие се активно промовирани.
Од Народната банка реагираа дека се „непријатно изненадени“ од ваквите одлуки на дел од банките, оценувајќи дека тие не одат во прилог на поттикнување на електронските плаќања и намалување на трошоците за граѓаните.
Економските аналитичари предупредуваат дека новите тарифници ќе значат дополнителен товар за домаќинствата, особено во услови на растечки трошоци за живот, а останува отворено прашањето дали и останатите банки ќе го следат истиот тренд.
…
