На булеварот „Александар Македонски“ кај бензинската станица „Макпетрол“ во недела, 7 јуни, ќе се изведуваат активности за поставување нови семафори на пешачкиот премин, информираат од ЈП „Улици и патишта“ – Скопје.
Работите ќе започнат во 8 часот, а ќе опфатат монтажа на нови портални семафорски столбови и поставување нови светлосни сигнали на локацијата каде што постојната опрема неодамна беше оштетена во сообраќајна незгода.
Поради изведбата на работите ќе биде воведен изменет режим на сообраќај. Во првата фаза, која ќе се реализира на страната кон влезот во Скопје, возилата ќе бидат пренасочувани преку клучката кај Сингелиќ и Маџари.
Во втората фаза, на коловозот во правец на излез од градот, сообраќајот ќе се пренасочува преку улицата „Благоја Стефковски“.
Од претпријатието информираат дека на терен ќе биде поставена соодветна сообраќајна сигнализација и опрема, а ќе бидат ангажирани и редари за регулирање на движењето.
Иако не се очекува целосен прекин на сообраќајот, од ЈП „Улици и патишта“ предупредуваат дека во текот на денот се можни застои и отежнато одвивање на сообраќајот, поради што апелираат до граѓаните за трпение и почитување на привремената сигнализација до завршување на работите.
…
