На Меѓународната вселенска станица е активирана зголемена готовност, откако е откриено протекување на воздух во рускиот сегмент на орбиталната лабораторија, соопшти НАСА.
Според информациите, проблемот е лоциран во тунелот за пренос на сервисниот модул „Звезда“, каде што е забележана пукнатина низ која истекува воздух. Екипажот, составен од двајца американски астронаути, еден француски астронаут и еден руски космонаут, добил инструкции да се засолни во вселенското летало „Кру Драгон“, кое е прикачено на станицата.
Астронаутите, како мерка на претпазливост, носат вселенски одела во случај да биде потребна итна евакуација. Од НАСА наведуваат дека ситуацијата се следи внимателно и дека се работи на стабилизирање на притисокот и дополнителни технички интервенции.
Руската вселенска агенција „Роскосмос“ веќе спроведува мерки за привремено санирање на оштетувањето, додека заедничките тимови анализираат што ја предизвикало пукнатината и ризикот од нејзино проширување.
…
