Грчките гранични власти ќе можат привремено да ја суспендираат биометриската обработка во рамки на новиот ЕЕС систем на преминот Евзони во периоди на голем метеж, при што од 10 април до 8 јули годинава мерката ќе важи со можност за продолжување до 6 септември 2026 година. Во вакви ситуации патниците ќе се регистрираат без земање отпечатоци и фотографирање, со цел да се забрза протокот на возила.
Одлуката е донесена поради честите километарски колони на границата и зголемениот притисок за време на туристичката сезона. Грчките власти наведуваат дека ова е дел од флексибилноста што ја дозволуваат правилата на Европската Унија во првите месеци од примената на системот.
Според новиот модел, на копнените премини нема да има самостојни киосци за регистрација, туку контролата ќе се врши со преносни уреди и рачни таблети кои ќе ги користи граничната полиција директно на терен.
Проблемот со застојот на Евзони предизвика реакции од туристичкиот сектор во Грција, како и поплаки од соседни земји. Грчкиот министер за заштита на граѓаните потврдил дека се разгледуваат решенија за да се избегне колапс на сообраќајот и да се олесни преминот во шпицот на сезоната.
…
