„Енвидија“ го купи за 400 милиони долари „Кумо АИ“, мал стартап кој развива основни модели дизајнирани да прават точни деловни предвидувања во кој коосновач и извршен директор е Македонецот Вања Јосифовски.
Според порталите за технологија и бизнис „Информејшн“ и „Форчун“, „Енвидија“ одбила коментар, а информацијата е потврдена од повеќе извори запознаени со трансакцијата.
Tројцата коосновачи на „Кумо АИ“, Вања Јосифовски, професорот на Стенфорд Јуре Лесковец и Хема Рагаван, поранешна инженеринг директорка на „Линкдин“, минатиот месец преминале во „Енвидија“ според нивните профили на Линкдин, но на веб-страницата на комшанијата нема официјална информација за продажбата.
Скопјанецот Вања Јосифовски, кој повеќе години живее и работи во САД, беше главен директор за тенологија во „Ербиенби“ и „Пинтерест“, а претходно главен истражувач на интернет компанија „Јаху“.
„Енвидија“ е водечка американска мултинационална технолошка компанија специјализирана за дизајнирање и производство на графички процесори, чипови за вештачка интелигенција и хардвер за центри за податоци. Таа е еден од најголемите и најважни двигатели на современата технологија во светот.
…
