Тензиите на Блискиот Исток дополнително се зголемуваат откако Иран упати остри закани кон Израел и Соединетите Американски Држави по најновите израелски напади врз јужните предградија на Бејрут.
Портпаролот на Комитетот за национална безбедност и надворешна политика на иранскиот парламент, Ебрахим Резаи, порача дека Техеран подготвува „цврст и болен одговор“ на, како што ја нарече, израелската агресија врз либанската престолнина.
„Ќе одговориме цврсто и болно на агресијата на ционистичкиот режим кај Бејрут. Овие бесни кучиња мора да ги дисциплинираме и да ги ставиме на нивното место“, изјави Резаи.
Во меѓувреме, претседателот на иранскиот парламент и главен преговарач Мохамед Багер Галибаф предупреди дека Иран е подготвен и за директна конфронтација со САД доколку продолжи израелската воена операција во Либан.
Според него, поддршката што Вашингтон му ја дава на Израел ги прави американските воени бази во регионот потенцијални цели.
„Зеленото светло што САД му го даде на ционистичкиот режим ги претвора американските бази во регионот во легитимни цели“, напиша Галибаф на социјалната мрежа Икс.
Тој нагласи дека иранските вооружени сили се подготвени за дејствување и предупреди дека доколку продолжи израелската агресија врз Либан, Техеран нема да се ограничи само на дипломатски чекори.
„Ако продолжи израелската агресија против Либан, нема да го прекинеме процесот на преговори, туку веднаш ќе се впуштиме во директна конфронтација со непријателот“, изјави Галибаф.
Претходно, Либанската национална новинска агенција (ННА) соопшти дека израелските напади биле насочени кон два стана во квартот Дахија, упориште на движењето Хезболах во јужниот дел на Бејрут.
Израелскиот премиер Бенјамин Нетанјаху изјави дека нападите претставуваат одговор на ракетните напади врз северниот дел на Израел. Израелските власти соопштија дека утрово биле регистрирани најмалку пет проектили истрелани од територијата на Либан.
Засега Хезболах не ја презеде одговорноста за ракетните напади, додека меѓународната заедница со загриженост ги следи настаните поради стравувањата дека конфликтот би можел дополнително да се прошири и да вовлече нови регионални и светски актери.
