Европската Унија упати остро предупредување до Албанија поради контроверзниот туристички проект во заштитеното подрачје Вјоса-Нарта, кој се поврзува со американскиот бизнисмен Џаред Кушнер. Од Брисел порачаа дека реализацијата на проектот може негативно да влијае врз напредокот на земјата во процесот на пристапување кон Европската Унија.
Предупредувањето доаѓа во време кога во Албанија веќе неколку дена се одржуваат масовни протести против изградбата на луксузниот туристички комплекс во едно од највредните природни подрачја во земјата. Регионот Вјоса-Нарта е познат по богатата биолошка разновидност и претставува живеалиште на бројни заштитени видови, меѓу кои фламинга, морски желки и други ретки животински видови.
Од Европската комисија истакнаа дека Албанија мора да се воздржи од активности кои би можеле да го доведат во прашање исполнувањето на обврските од Поглавјето 27, кое се однесува на заштитата на животната средина и климатските политики – едно од клучните поглавја во преговорите за членство во Унијата.
Брисел побара целосно усогласување на албанското законодавство со европските директиви за заштита на природните живеалишта и дивите птици. Дополнително, беше побарано укинување на измените во Законот за заштитени подрачја, како и преиспитување на Законот за стратешки инвестиции кој овозможил реализација на проектот.
Според информациите од Европската комисија, албанскиот министер за животна средина Софјан Јаупај информирал дека активностите поврзани со проектот во моментов се стопирани и дека ќе биде спроведена детална процена на влијанието врз животната средина, во која ќе бидат вклучени и граѓански организации.
Во меѓувреме, Специјалното обвинителство за борба против корупцијата во Албанија започнало истрага за промените на статусот на заштитеното подрачје и за сопственичките односи на земјиштето поврзано со спорниот проект.
Протестното движење, кое организаторите го нарекоа „Револуција на фламингата“, добива сè поголема поддршка не само во Албанија, туку и меѓу албанската дијаспора во повеќе европски држави и во Соединетите Американски Држави.
Албанија, заедно со Црна Гора, важи за една од земјите од Западен Балкан кои најбрзо напредуваат кон членство во Европската Унија. Премиерот Еди Рама претходно изјави дека амбицијата на земјата е да стане полноправна членка на Унијата до 2030 година, но најновите случувања околу проектот во Вјоса-Нарта отвораат нови прашања за усогласеноста на земјата со европските стандарди во областа на заштитата на природата и животната средина.
