Граѓаните на Скопје кои се снабдуваат со топлинска енергија преку системот за централно греење во наредните три месеци ќе добиваат значително пониски сметки за парно. Првата фактура со намален износ веќе е доставена до потрошувачите, а истото намалување ќе продолжи и во текот на јуни и јули како дел од редовното годишно порамнување.
Од АД ЕСМ информираат дека пониските сметки се резултат на разликата меѓу авансно фактурираната и реално потрошената топлинска енергија во текот на грејната сезона 2025/2026.
Според компанијата, изминатата грејна сезона започнала порано од вообичаено, на 2 октомври 2025 година, а завршила подоцна, на 2 мај 2026 година. Иако сезоната траела подолго, во одредени периоди надворешните температури биле повисоки од прогнозите врз кои биле пресметувани месечните авансни фактури. Поради тоа, реалната потрошувачка на топлинска енергија била пониска од пресметаната, што довело до враќање на дел од средствата преку годишното порамнување.
Од ЕСМ посочуваат дека намалувањето не е еднакво за сите корисници и не може да се изрази со единствен процент. Висината на порамнувањето зависи од повеќе фактори, меѓу кои количината на испорачана топлинска енергија, карактеристиките на објектот, квалитетот на изолацијата, состојбата на инсталациите и енергетската ефикасност на системот за греење.
Утврдената разлика од годишното порамнување се распределува на три еднакви месечни рати и ќе биде прикажана во фактурите за мај, јуни и јули. Токму затоа кај секој потрошувач износот на намалувањето ќе биде идентичен во овие три месеци, но ќе се разликува од домаќинство до домаќинство.
Воедно, од компанијата потсетуваат дека летниот период е најповолен за проверка и сервисирање на внатрешните инсталации и радијаторите, бидејќи тогаш системот не е под работен притисок. Редовното одржување на инсталациите е обврска на сопствениците и е важно за непречено функционирање на греењето во зимските месеци.
На потрошувачите им се препорачува навреме да ја проверат состојбата на радијаторите и по потреба да ги заменат, имајќи предвид дека нивниот работен век најчесто изнесува најмалку десет години, зависно од производителот и начинот на одржување.
Од ЕСМ дополнително посочуваат дека доколку се појави дефект во стан чиј сопственик не реагира или не престојува во него, надлежна за решавање на проблемот е Заедницата на станари, согласно правилата за заедничко домување.
По завршување на сите интервенции, граѓаните треба да го известат Центарот за грижа на потрошувачи за да се обезбеди непречено снабдување со топлинска енергија во претстојната сезона. Исто така, неопходно е да се обезбеди непречен пристап до топлинските потстаници и редовно електрично напојување преку функционална инсталација и навремено подмирени сметки за електрична енергија.
