Претседателот на Реал Мадрид, Флорентино Перез, се обрати по изборната победа и реизборот на функцијата до 2030 година, нагласувајќи дека клубот ќе продолжи да се развива и да се бори за нови успеси на домашната и европската сцена.
„Победивме на изборите и ќе продолжиме да работиме за да освојуваме титули. Победивме на сите избирачки места и го остваривме вториот најдобар изборен резултат во историјата на клубот. Најдобриот резултат исто така беше наш, во 2004 година“, изјави Перез.
Тој истакна дека добиената доверба претставува голема чест и одговорност, додавајќи дека дел од гласовите испратени по пошта биле поништени поради процедурални причини, одлука што клубот има намера да ја оспори.
Перез порача дека ќе продолжи да ги брани интересите на Реал Мадрид и дека главната цел останува освојување нови трофеи, вклучително и 16-тата европска круна. Во говорот посебно ја истакна важноста на единството меѓу членовите на клубот и неговата независност.
„Ова е Реал Мадрид каков што сите го сакаме – независен клуб кој не се плаши од предизвици и пречки“, рече Перез.
Тој додаде дека клубот ќе продолжи да се гордее со Сантијаго Бернабе и со проектите што треба да ја обликуваат иднината на клубот. Воедно, претседателот најави дека во наредниот период се очекува и официјалното претставување на Жозе Мурињо, што дополнително ја зголемува возбудата меѓу навивачите пред новата ера на „кралскиот клуб“.
На крајот, Перез им се заблагодари на сите членови за поддршката и порача дека ќе работи во интерес на целиот клуб, со јасна цел – Реал Мадрид да остане репер за успех и величина во светскиот фудбал.
