Албанскиот премиер Еди Рама порача дека проектот за изградба на луксузен туристички ресорт во Зврнец ќе биде реализиран и покрај протестите што се одржуваат низ Албанија и во дијаспората.
Во своето обраќање во подкастот „Фласим“, Рама оцени дека станува збор за инвестиција од стратешко значење за државата, која ќе донесе економски развој, нови работни места и дополнително ќе го зајакне туристичкиот потенцијал на Албанија.
„Албанија нема да остане заложник. Проектот ќе биде реализиран без оглед на противењата, бидејќи е инвестиција од стратешко значење за земјата“, изјави Рама.
Проектот, кој се поврзува со инвестиции на компании поврзани со Џаред Кушнер, предизвика силни реакции кај дел од јавноста и еколошките организации, кои предупредуваат на можни негативни последици врз животната средина и заштитените природни подрачја во регионот на Зврнец.
Албанскиот премиер ги отфрли обвинувањата дека инвестицијата ќе ја загрози локалната флора и фауна, потсетувајќи дека во минатото во истите подрачја имало нелегален лов на фламинга.
Тој исто така предупреди дека продолжените протести можат да влијаат врз туристичката сезона, посочувајќи дека веќе има сигнали за откажување на резервации во туристичките центри на југот од земјата, меѓу кои Саранда, Валона и Химара.
Во меѓувреме, протестите продолжуваат во Тирана и други албански градови, а поддршка за демонстрантите беше изразена и пред албанските дипломатски претставништва во Лондон, Њујорк, Атина, Фиренца и во Швајцарија.
Владата тврди дека инвестицијата, чија вредност се проценува на повеќе од четири милијарди евра, ќе придонесе за значителен економски раст и ќе ја позиционира Албанија меѓу водечките туристички дестинации во регионот.
…
