Иран рано утрово изврши ракетни и беспилотни напади врз американски воени цели на Блискиот Исток, соопшти Иранската револуционерна гарда (IRGC), оценувајќи ја операцијата како одговор на претходните американски напади врз иранска територија.
Според иранските власти, цел на нападите биле американска воена база во Јордан и седиштето на Петтата флота на САД во Бахреин. По нападите, во Бахреин и Кувајт се огласија сирени за воздушна опасност, а локалните власти потврдија дека системите за противвоздушна одбрана биле активирани за пресретнување на цели во воздухот.
Ескалацијата на тензиите доаѓа откако иранскиот министер за надворешни работи, Абас Арагчи, предупреди дека секој американски напад врз Иран ќе добие соодветен одговор.
Во меѓувреме, експлозии биле пријавени и во неколку стратешки важни области во близина на Ормутскиот теснец. Меѓу погодените локации се островот Кешм, како и градовите Бандар Абас, Сирик, Минаб и Џаск, кои имаат значајно воено и логистичко значење за Иран.
Островот Кешм претставува важна точка во иранскиот систем за одбрана на Ормутскиот теснец, додека Бандар Абас е дом на клучни поморски и воздухопловни капацитети. Џаск, пак, покрај военото присуство, располага и со едно од најзначајните комерцијални пристаништа во регионот.
Развојот на настаните дополнително ги зголемува стравувањата од поширока регионална ескалација на конфликтот на Блискиот Исток.
…
