ТИРАНА – Илјадници граѓани се собраа во центарот на Тирана на досега најголемиот протест против изградбата на луксузен туристички комплекс поддржан од Џаред Кушнер, зет на американскиот претседател Доналд Трамп.
Демонстрантите се собраа пред кабинетот на албанскиот премиер Еди Рама, носејќи транспаренти со пораки „Албанија не е на продажба“ и извикувајќи слогани за промени во земјата. Колоната од демонстранти се протегала долж една од главните градски сообраќајници.
Проектот, чија вредност се проценува на околу пет милијарди евра, предизвика силни реакции поради планираната локација во близина на заштитено природно подрачје кај Звернец, на јужниот брег на Албанија. Областа е позната како живеалиште на фламинга, морски желки и медитерански фоки.
Противниците на проектот предупредуваат дека изградбата може сериозно да му наштети на екосистемот, а изразуваат и загриженост поради, како што велат, недоволната транспарентност околу договорите со странските инвеститори.
Протестите, кои започнаа токму во Звернец, добија назив „Револуција на фламингата“, симболично поврзувајќи ја борбата за зачувување на природата со отпорот кон проектот.
Премиерот Еди Рама ги отфрли обвинувањата дека ќе биде загрозена животната средина, нагласувајќи дека ќе биде изработена проценка за влијанието врз природата и дека сите активности ќе се спроведуваат во согласност со законските процедури.
Во меѓувреме, и Европската унија испрати предупредување до Тирана, истакнувајќи дека усогласувањето со европските еколошки стандарди е еден од условите за напредок на Албанија во процесот на пристапување кон Унијата.
Незадоволството од проектот дополнително ги отвори прашањата за корупцијата и довербата во институциите. Дел од демонстрантите порачаа дека се уморни од политичкиот статус-кво и побараа нова ера за Албанија.
Луксузниот ресорт е иницијатива на Џаред Кушнер и неговата сопруга Иванка Трамп, кои во минатото изјавија дека се вљубиле во Албанија за време на посета со јахта. И покрај растечкиот отпор во јавноста, премиерот Рама изјави дека проектот ќе продолжи да се реализира.
…
