Министерот за здравство Азир Алиу откри дека во листите на чекање за хируршки интервенции сè уште се евидентирани и пациенти кои починале, оценувајќи дека системот мора постојано да се ажурира и „чисти“ во соработка со здравствените установи.
Тој посочи дека до Министерството пристигнуваат индиции и сомнежи од пациенти за можни злоупотреби поврзани со листите на чекање, но нагласи дека во овој момент нема доволно документација тие случаи јавно да се презентираат.
– Има ситуации кога пациент, на пример со онколошко заболување, се враќа бидејќи лабораториските резултати не се соодветни за интервенција, а потоа во друга лабораторија се покажува поинаква состојба. Овие случаи мора детално да се анализираат за да се утврди дали постојат злоупотреби – изјави Алиу.
Министерот нагласи дека меѓу лицата кои се водат на листите за чекање има и пациенти кои веќе не се живи, поради што е неопходна редовна проверка и ажурирање на податоците.
– Имаме пациенти кои, за жал, веќе не се меѓу нас и тие мора да се отстранат од листите. Тоа не може да го прави само Министерството, туку заедно со здравствените установи. Затоа имаме и наши вработени на терен кои учествуваат во ажурирањето – рече Алиу.
Тој потсети дека во февруари беше пуштен во употреба порталот за електронско следење на листите за елективни хируршки интервенции, кој функционира според принципот „прв дојден – прв услужен“.
Алиу информираше и дека системот за евиденција на работното време преку отпечаток од прст моментално е во пилот-фаза и се применува во Министерството за здравство и на три клиники во Клиничкиот центар „Мајка Тереза“ – Инфективната клиника, Торакална хирургија и Трансфузиологија.
– Системот е во пилот-фаза. Има отпор кон промените, но ова е позитивен процес бидејќи ќе овозможи реална евиденција на работното време и прекувремените часови, а истовремено ќе го намали притисокот врз оние што навистина работат – изјави министерот.
Тој додаде дека Министерството анализира и можности за евентуално пренасочување на пациенти од јавниот кон приватниот здравствен сектор, но дека засега нема донесено конечни одлуки.
…
