Вицепремиерот и министер за транспорт и врски, Александар Николоски, најави почеток на изградбата на автопатот Скопје – Блаце, оценувајќи го проектот како една од најзначајните инфраструктурни инвестиции за подобрување на регионалната поврзаност.
На работна средба со директорот на канцеларијата на Европската банка за обнова и развој (ЕБОР), Фатих Туркменоглу, се разговарало за реализацијата на проектот и следните активности поврзани со изградбата на автопатската делница.
„Автопатот Скопје – Блаце претставува витална патна артерија со која Македонија се поврзува со Косово и Црна Гора. Неговата изградба ќе придонесе за поефикасен транспорт и побезбеден сообраќај, ќе ја подобри поврзаноста со соседните земји и ќе создаде нови можности за економски развој, трговија и инвестиции“, истакна Николоски.
Тој посочи дека изведувач на проектот е конзорциум предводен од македонската градежна компанија „Гранит“, нагласувајќи дека по подолг временски период домашна компанија ќе има водечка улога во целосната реализација на еден автопатски проект.
Според предвидената проектна документација, на трасата ќе бидат изградени пет тунели, две галерии и 12 мостови, а заедно со останатите помали инфраструктурни зафати, вкупно 40 објекти ќе се реализираат на терен.
Николоски оцени дека со изградбата на автопатот Скопје – Блаце, Македонија дополнително ќе ја зацврсти својата позиција како важна транзитна и транспортна врска во регионот.
„Ја градиме Македонија“, порача Николоски.
….
