Бугарската престолнина Софија веќе ги прави првите подготовки за можноста да биде домаќин на Евровизија 2027, а според проценките на локалните власти, градот би можел да пречека меѓу 300.000 и 400.000 посетители од целиот свет.
Општинскиот советник Димитар Петров во изјава за Радио Софија нагласи дека организацијата на Евровизија не е само музички спектакл кој трае неколку дена, туку комплексен проект со огромни логистички и безбедносни барања.
„Евровизија е вистински град во градот. Станува збор за настан кој бара сериозна организација, координација и инфраструктура за да може успешно да се реализира“, изјави Петров.
Хотели, авиолинии и инфраструктура
Според него, Софија располага со сите предуслови за организација на најголемиот музички настан во Европа. Меѓународниот аеродром, големиот број директни авиолинии кон европските метрополи и растечкиот хотелски капацитет се меѓу главните адути на бугарската престолнина.
Во изминатите години Софија значително ја модернизираше туристичката и транспортната инфраструктура, а градските власти сметаат дека токму тоа може да биде клучна предност во трката за домаќинство.
Цените веќе „експлодираат“
Но, додека градот сонува за Евровизија, веќе се појавуваат и првите проблеми.
По победата на бугарската претставничка Дара и зголемените очекувања дека Евровизија би можела да се одржи токму во Софија, дел од сопствениците на станови и апартмани почнале драстично да ги зголемуваат цените.
Според Петров, на платформите за изнајмување веќе се појавиле огласи во кои двособни станови се нудат за суми меѓу 10.000 и 13.000 евра неделно.
„Тоа не смееме да го дозволиме. Евровизија треба да биде достапна за сите посетители, а не само за оние со најдлабок џеб. Потребна е координација меѓу институциите за да се спречат нереални поскапувања“, предупреди тој.
Евровизија како економски бум
Според анализите од претходните домаќини, Евровизија носи огромни економски придобивки. Само во текот на неколку недели се бележи значителен раст на туристичкиот промет, приходите во угостителството, транспортот, трговијата и услужниот сектор.
За споредба, минатите изданија на Евровизија во градови како Ливерпул, Малме и Базел привлекоа стотици илјади посетители и милиони телевизиски гледачи ширум светот.
Доколку Софија ја добие организацијата, тоа би можело да биде најголемиот туристички настан во историјата на современа Бугарија.
Симболична година за Бугарија
Петров потсети дека 2027 година ќе има и дополнителна симболика за земјата. Тогаш ќе се одбележат 20 години од влезот на Бугарија во Европската Унија, што според него претставува одлична можност за меѓународна промоција на државата.
„Тоа ќе биде шанса Бугарија да се претстави пред милионска публика како модерна европска земја, туристичка дестинација и домаќин способен да организира настан од светски размери“, оцени тој.
Додека конечната одлука за домаќинот на Евровизија 2027 сè уште не е донесена, во Софија веќе владее евровизиска еуфорија, а градот се подготвува за сценарио кое би можело да донесе стотици милиони евра приходи и невидена меѓународна промоција.
