Додека САД се соочуваат со ескалација на конфликтот со Иран, растечки цени и сè поголем политички притисок, американскиот претседател Доналд Трамп својот 80-ти роденден ќе го одбележи на несекојдневен начин – со голем УФЦ спектакл организиран директно на тревникот на Белата куќа.
Во недела, јужниот тревник на претседателската резиденција ќе биде претворен во боречка арена за настанот „UFC Freedom 250“, кој се организира во чест на 250-годишнината од основањето на Соединетите Американски Држави, но воедно ќе биде и роденденска прослава на Трамп.
Октагон пред прозорците на Белата куќа
Според најавите, специјално изградена арена висока речиси 30 метри ќе биде поставена на само неколку десетици метри од приватните простории на претседателот. Во центарот ќе се наоѓа препознатливиот УФЦ октагон, каде ќе се одржат седум професионални борби.
Организаторите очекуваат околу 4.000 гости, меѓу кои високи политички функционери, бизнисмени, донатори и припадници на американската војска.
Според американските медиуми, билетите не биле достапни за пошироката јавност, а дел од поканите биле резервирани за донатори кои издвоиле повеќе од еден милион долари за политички активности.
Борба за титула како главен настан
Главниот меч на вечерта ќе биде пресметката меѓу актуелниот шампион во лесна категорија, Илија Топурија, и поранешниот привремен шампион Џастин Гејџи.
УФЦ претседателот Дејна Вајт, долгогодишен сојузник и пријател на Трамп, лично учествувал во подготовките за настанот, кој веќе се опишува како еден од најнеобичните спортски спектакли во американската историја.
Критики поради тајмингот
Настанот предизвика поделени реакции во американската јавност.
Поддржувачите го гледаат како патриотска прослава и симбол на американската култура, додека критичарите сметаат дека организацијата на ваков спектакл во момент кога земјата е вклучена во воен конфликт со Иран испраќа погрешна порака.
Особено внимание привлекува фактот што настанот се одржува во време кога американската администрација се соочува со сериозни безбедносни и економски предизвици.
Според последната анкета на Ројтерс/Ипсос, само 16 проценти од Американците сметаат дека е соодветно ваков спортски спектакл да се организира во кругот на Белата куќа.
Трамп и УФЦ – долгогодишна врска
Доналд Трамп со години е близок до УФЦ организацијата и нејзиниот претседател Дејна Вајт. Тој редовно присуствува на големи боречки настани и често е поздравуван од публиката.
Многумина сметаат дека токму ваквиот спектакл совршено го отсликува неговиот политички стил – комбинација од шоу, спорт, политика и силна медиумска експозиција.
Без разлика дали ќе биде запаметен како патриотска прослава или како контроверзен политички потег, УФЦ арената пред Белата куќа веќе влезе во историјата како еден од најнеобичните настани организирани во претседателската резиденција на САД.
