Почетокот на летната сезона донесе вистински хаос на граничните премини кон Грција, каде илјадници туристи од Македонија, Србија и другите земји од регионот се соочуваат со повеќечасовни чекања и километарски колони.
Овој викенд, прв по завршувањето на наставната година, ги донесе и првите сериозни проблеми за патниците кои се упатија кон грчките плажи. Според бројни сведоштва објавени на социјалните мрежи, на граничниот премин Евзони за влез во Грција се чека од два до четири часа.
Дополнително, големи гужви се регистрирани и на преминот Дојран, каде колоната од возила во одредени периоди достигнува и повеќе од еден километар.
Патниците предупредуваат дека високите температури дополнително ја отежнуваат ситуацијата, особено за семејствата со мали деца кои со часови остануваат заглавени во возилата под жешкото сонце.
Според првичните информации, една од причините за забавениот проток е примената на новите процедури и системи за контрола на влез во Европската Унија, што значително го продолжува времето потребно за обработка на патниците на граничните премини.
Нешто подобра состојба засега има на граничниот премин Меџитлија кај Битола, каде сообраќајот се одвива побрзо, па дел од туристите веќе ја разгледуваат оваа алтернатива за избегнување на најголемите метежи.
Со оглед дека летната сезона штотуку започнува, многумина стравуваат дека ваквите сцени би можеле да станат секојдневие во наредните недели, особено за време на викендите кога бројот на туристи традиционално е најголем.
Надлежните препорачуваат патниците навреме да го планираат патувањето, да ги следат информациите за состојбата на граничните премини и задолжително да носат доволно вода и освежување за подолг престој во колона.
