Премиерот Христијан Мицкоски очекува цените на горивата во Македонија да се намалат следната недела, по значителниот пад на цените на нафтата на светските берзи.
Веста за постигнатиот договор меѓу САД и Иран предизвика моментално намалување на цените на суровата нафта. Фјучерсите за нафтата „Брент“ забележаа пад од 4,02 проценти и достигнаа цена од 83,82 долари за барел, додека американската сурова нафта „Западен Тексас интермедијар“ поевтини за 4,63 проценти, спуштајќи се на 80,95 долари за барел.
Одговарајќи на новинарско прашање за движењето на цените на горивата во земјава, Мицкоски изјави дека одлуката што треба да ја донесе Регулаторната комисија за енергетика ќе се темели на податоците од изминатата недела.
„Очекувам цените да се движат во рамките на половина денар или да останат исти кога станува збор за дизел горивото, а кај бензините можно е зголемување од околу 1,5 до 2 денари. Но, следната недела очекувам позначително намалување, бидејќи денес берзанските цени на нафтата и нафтените деривати драматично паднаа, движејќи се околу 82 до 83 долари за барел“, изјави Мицкоски.
Тој нагласи дека и покрај можните краткорочни корекции, Македонија и натаму останува меѓу земјите со најниски цени на бензинот и дизелот во регионот.
…
