Министерот за надворешни работи и надворешна трговија, Тимчо Муцунски, во Даблин оствари средба со ирската министерка за надворешни работи, трговија и одбрана, Хелен Мекенти, на која беше потврдена поддршката на Ирска за европската перспектива на Северна Македонија.
На средбата биле истакнати добрите билатерални односи меѓу двете земји, како и заедничката определба за нивно натамошно унапредување преку засилена политичка, економска и трговска соработка.
Посебен фокус бил ставен на процесот на европска интеграција, во контекст на претстојното ирско претседавање со Советот на Европската Унија, кое започнува на 1 јули. Муцунски изразил благодарност за континуираната и принципиелна поддршка од Ирска за политиката на проширување на Унијата и за европските аспирации на земјата.
Тој ја нагласил посветеноста на Владата на спроведување на реформите и истакнал дека членството во Европската Унија останува стратешка цел и клучен двигател на демократскиот и економскиот развој.
Во разговорите биле разменети мислења и за актуелните регионални и глобални предизвици, при што двете страни се согласиле дека на Европа ѝ е потребно поголемо единство и засилена соработка во услови на зголемени геополитички тензии.
Во рамки на посетата, Муцунски остварил и средба со членовите на Заедничкиот комитет за прашања поврзани со Европската Унија во ирскиот парламент, каде биле разгледани состојбите во процесот на евроинтеграција и реформските приоритети на Северна Македонија.
Тој нагласил дека кредибилен процес на проширување, заснован на заслуги и Копенхашките критериуми, е клучен за зачувување на довербата во европскиот проект и неговата улога во регионот.
…
