Украинскиот претседател Володимир Зеленски изјави дека Украина ќе продолжи да одговара на руските напади сè додека војната трае, оценувајќи го утринскиот напад со беспилотни летала врз рафинерија во Москва како „целосно оправдан“.
Според Зеленски, акцијата била директен одговор на неодамнешниот руски напад врз Киево-Печерската лавра, еден од најзначајните историски и верски симболи на Украина.
„Ако Путин не сака да ја заврши оваа војна и сака да ја продолжи, ние нема да седиме мирно. Ќе одговориме“, порача украинскиот претседател.
Тој потсети дека украинските власти претходно најавиле одговор по нападот врз лаврата и додаде дека ветената реакција веќе е реализирана.
Зеленски нагласи дека Украина не ја посакувала војната и дека нејзина цел останува нејзиното завршување, но истовремено порача дека Киев нема да остане без реакција на нападите што доаѓаат од Русија.
Во своето обраќање, украинскиот лидер посочи и дека московскиот систем за воздушна одбрана не успеал да го спречи нападот со дронови, и покрај тоа што, како што рече, станува збор за една од најзаштитените области во Русија.
„Рековме дека ќе погодиме и го направивме тоа“, изјави Зеленски, додавајќи дека Украина ќе продолжи да возвраќа на, како што ги нарече, руските акти на агресија.
Изјавите на украинскиот претседател доаѓаат во период на засилени напади меѓу двете страни и зголемени тензии на фронтот, додека дипломатските напори за прекин на конфликтот засега не даваат резултати.
…
