Денеска во ЈЗУ Клиничка болница Тетово беа донесени одлуки за вработување на 119 лица од 13 различни медицински профили, неопходни за секојдневното функционирање на болницата. Според министерот за здравство Азир Алиу, ова претставува значаен институционален чекор кон зајакнување на кадровските капацитети на една од најважните здравствени установи во Полошкиот регион.
Од почетокот на годината во Клиничката болница Тетово веќе биле вработени 38 лица, од кои 28 специјализанти и 10 лица технички персонал и болничари. Со најновите одлуки, бројот на нововработени достигнува вкупно 157 лица.
Министерот Алиу истакна дека кадровското зајакнување се реализира паралелно со големиот инвестициски циклус за болницата, вреден околу 74 милиони евра. Проектот предвидува целосна реконструкција и модернизација на Клиничката болница Тетово, нова функционална организација, подобри услови за пациентите и подобри услови за работа на здравствените работници.
„Тетово и целиот Полошки регион ќе добијат болница што ќе одговори на реалните потреби на граѓаните“, порача Алиу.
Тој упати и посебна благодарност до директорот на Клиничката болница Тетово, д-р спец. Ерзен Елези, за посветеноста, одговорното менаџирање и соработката во процесот на кадровско и институционално зајакнување на оваа здравствена установа.
