Грција се подготвува за значајна промена во начинот на наплата на патарините, со воведување на современ систем кој ќе овозможи возачите да плаќаат само за реално изминатото растојание на автопатите.
Новиот модел, познат како систем на слободен проток на сообраќај, ќе овозможи возилата да се движат без запирање на наплатните рампи и без намалување на брзината. Наместо фиксни износи на одредени наплатни станици, патарината ќе се пресметува врз основа на бројот на поминати километри.
Според најавите на грчките власти, првиот автопат што целосно ќе функционира според овој принцип ќе биде Северната патна оска на Крит. Проектот треба да послужи како тест-модел пред евентуалното проширување на системот и на други големи автопатски правци во земјата, меѓу кои Атики Одос и ПАТЕ.
Новиот начин на наплата ќе се базира на дигитални портали поставени над коловозот, опремени со камери за препознавање на регистарските таблички, ласерски сензори за класификација на возилата и уреди за читање електронски ознаки за наплата.
Плаќањето ќе се врши електронски преку кориснички сметки поврзани со електронски тагови, а за возачите кои нема да користат такви уреди ќе бидат достапни мобилна апликација и интернет-платформа.
Грчките власти најавуваат и автоматска контрола на неплатените патарини. Секое возило што ќе помине без извршена уплата ќе биде евидентирано преку регистарската табличка, по што сопственикот ќе добие рок за подмирување на обврската. Во спротивно, ќе следува парична казна.
Системот за наплата според изминати километри веќе делумно функционира на автопатот Олимпија Одос за корисниците на електронски ознаки, но новото решение на Крит ќе овозможи целосно автоматизирана наплата за сите возачи и може да стане стандард на грчките автопати во наредните години.
…
