Премиерот Христијан Мицкоски најави дека од понеделник се очекува намалување на цените на горивата, при што, според неговите проценки, бензините би можеле да поевтинат за околу четири денари по литар, а дизелот за околу седум денари.
Тој истакна дека очекува стабилизација на пазарот на нафтени деривати, по најавите за мировни преговори меѓу САД и Иран, што, како што рече, би можело да влијае на глобалните енергетски текови.
Мицкоски додаде дека Регулаторната комисија за енергетика во понеделник треба да ја донесе официјалната одлука за новите цени, врз основа на тековните пазарни калкулации и движењата на светските берзи.
Според него, иако доларот бележи одредени промени, се очекува процес на постепено стабилизирање на цените на нафтата во наредниот период.
Тој посочи дека евентуалната стабилизација на состојбите, вклучително и отворањето на клучни поморски рути, ќе има влијание врз глобалниот енергетски пазар, но дека процесот нема да биде брз.
Мицкоски очекува до крајот на годината просечната цена на барел нафта да се движи меѓу 70 и 80 долари, доколку се реализираат најавените геополитички и економски стабилизации.
…
