Бројот на загинати во конфликтот меѓу Израел и Хезболах надмина 4.000 лица, соопшти либанското Министерство за здравство, наведувајќи дека од почетокот на интензивните судири на 2 март досега животот го загубиле 4.057 лица.
Според официјалните податоци, меѓу жртвите има и 135 припадници на службите за спасување и итна медицинска помош. Во вкупната бројка се вклучени и 83 лица кои загинале во вчерашните израелски воздушни напади врз јужните и источните делови на Либан, додека уште 141 лице биле повредени.
И покрај информациите за постигнат договор за прекин на огнот, израелската армија денеска повторно изврши напади врз цели во јужен Либан.
Локалните власти соопштија дека во денешните воздушни удари загинале најмалку 16 лица, меѓу кои и две деца. Според Либанската национална новинска агенција, повеќе лица сè уште се водат како исчезнати и се затрупани под урнатините на погодените станбени објекти во градот Набатија и околните населени места.
Спасувачките екипи продолжуваат со потрагата по преживеани, додека хуманитарната состојба во јужен Либан дополнително се влошува по последната ескалација на насилствата.
…
