Две лица се здобиле со тешки телесни повреди во сообраќајна несреќа што се случила ноќеска на патот Битола – Маково, во близина на селото Логоварди.
Според информациите од Министерството за внатрешни работи, несреќата била пријавена на 20 јуни во 00:19 часот, а во неа учествувале три патнички возила. Станува збор за „Ауди“ управувано од 23-годишниот Д.Б. од Логоварди, „Форд“ управуван од 23-годишниот А.П. од Битола, во кој се превезувал и 13-годишен сопатник, како и „Мазда“ управувана од 23-годишниот А.К. од селото Добромири, Општина Новаци, со 29-годишна сопатничка.
Во несреќата тешки телесни повреди добиле возачите А.П. и А.К., додека сопатниците се здобиле со телесни повреди. Повредите биле констатирани во Клиничката болница во Битола.
Увид на местото на несреќата извршила увидна екипа на СВР Битола.
Од МВР информираат дека по несреќата бил лишен од слобода возачот Д.Б., откако било утврдено дека управувал моторно возило и покрај изречена забрана за управување. По целосното документирање на случајот, против него ќе биде поднесен соодветен поднесок.
