Украинскиот претседател Володимир Зеленски соопшти дека го враќа на Полска високото државно признание „Орден на белиот орел“, откако полскиот претседател Карол Навроцки претходно најави дека одликувањето ќе му биде одземено поради несогласувања поврзани со историски прашања.
Одлуката доаѓа во период на засилени политички и историски недоразбирања меѓу двете земји, кои и покрај блиската соработка во последните години, сè почесто се соочуваат со различни ставови за настаните од минатото.
Во објава на Телеграм, Зеленски истакна дека признанието доделено во 2023 година го доживувал како симбол на почит кон украинскиот народ и украинските вооружени сили.
„Бевме уверени дека ‘Орденот на белиот орел’ му беше доделен токму на украинскиот народ и на нашата војска. Верувам дека иднината ќе го потврди почитувањето кое Украинците го уживаат“, порача Зеленски.
Тој нагласи дека Украина високо ја цени поддршката што Полска ѝ ја даде од почетокот на руската инвазија и дека соработката меѓу двете држави останува значајна.
Украинскиот претседател додаде дека Киев останува подготвен за отворен и конструктивен дијалог со Варшава, со цел чувствителните историски теми да не станат причина за нови поделби и недоразбирања, туку да се зачува почитта кон сите жртви од минатиот век.
…
