Најмалку 54 лица се повредени, а 18 се водат како исчезнати по силна експлозија и пожар што избувнаа во гасна постројка во индустриската зона Рас Лафан во Катар, соопштија локалните власти.
Инцидентот се случил во текот на ноќта во постројката Барзан, која е дел од клучната инфраструктура за производство и извоз на природен гас во земјата. Според компанијата „Катар Енерџи“, експлозијата избувнала за време на активности поврзани со повторното активирање на капацитетите.
Првичните информации укажуваа на мал број повредени, но подоцна катарското Министерство за внатрешни работи соопшти дека бројот на настрадани е значително поголем. Спасувачките екипи продолжуваат со потрагата по 18 лица кои сè уште се водат како исчезнати.
Засега не е познат точниот обем на материјалната штета, а причините за несреќата се предмет на истрага.
Експлозијата се случува во чувствителен период за глобалниот енергетски пазар. Катар е меѓу најголемите светски извозници на природен гас, а неодамна започна подготовки за обновување на извозните активности по прекините предизвикани од тензиите во регионот и ограничувањата во Ормуската теснина.
Властите соопштија дека пожарот е ставен под контрола, додека надлежните служби продолжуваат со проценката на последиците од несреќата.
…
