Уставниот суд донесе одлука со која од 1 октомври ќе се зголемат платите на претседателот и судиите на оваа институција, откако беа укинати делови од Законот за плата и други надоместоци на избрани и именувани лица.
Со одлуката се поништуваат одредби кои ги намалија коефициентите за пресметка на платите на претседателот и членовите на Уставниот суд. Од Судот оценуваат дека нивниот материјален статус е тесно поврзан со независноста и самостојноста на институцијата, поради што не може да биде регулиран на ист начин како кај другите носители на јавни функции.
Во образложението се наведува дека уставните судии имаат специфична уставна улога и дека нивните примања треба да ги одразуваат гаранциите за независно вршење на функцијата.
Постапката била покрената по иницијатива на самиот Уставен суд. Владата и Собранието биле известени и повикани да достават мислење, но тоа не го сториле во законскиот рок.
Со враќањето на старите коефициенти, платата на претседателот на Уставниот суд повторно ќе се пресметува со коефициент 3,08, додека за останатите судии ќе важи коефициент 2,85. Со претходните законски измени тие беа намалени на 2,81 и 2,60.
Според првичните проценки, одлуката ќе резултира со зголемување на месечните примања за најмалку 200 евра по функционер, а новата пресметка ќе почне да се применува од октомври годинава.
…
