Протестите во Албанија, кои започнаа како реакција на контроверзниот туристички проект во близина на островот Сазан, прераснуваат во пошироко политичко движење. Организаторите на таканаречената „Фламинго револуција“ сега бараат оставка од премиерот Еди Рама, формирање техничка влада и спроведување на уставни реформи.
🇦🇱 Thousands of people took to the streets of Tirana to protest the construction of a luxury resort on Sazan Island, a project linked to Jared Kushner — Donald Trump’s son-in-law
Protesters are also accusing Prime Minister Edi Rama’s government of corruption and a lack of… https://t.co/3bdis77Ouh pic.twitter.com/yL5kMloQoi
— NEXTA (@nexta_tv) June 22, 2026
Според нивните предлози, по заминувањето на актуелната влада треба да биде формирана непартиска преодна влада со едногодишен мандат, која ќе подготви политички и институционални промени во државата.
Меѓу барањата се и ограничување на премиерската функција на најмногу два мандата, како и воведување механизми за поголема еднаквост на граѓаните пред законот. Демонстрантите предлагаат овие измени да бидат потврдени преку референдум.
Тие исто така бараат поништување на повеќе законски измени, вклучително и одредби поврзани со заштитените подрачја и културното наследство.
Протестите траат веќе три недели, откако започна расчистувањето на теренот за изградба на луксузен туристички комплекс во заштитена област. Тензиите дополнително се зголемија по судирите меѓу демонстрантите и приватното обезбедување, кое постави огради за ограничување на пристапот до локацијата.
Контроверзниот проект се поврзува со Џаред Кушнер, зет на американскиот претседател Доналд Трамп, што дополнително го засили вниманието на јавноста.
Во меѓувреме, движењето ги прошири своите пораки и кон економските проблеми во земјата. Дел од учесниците предупредуваат на ниските плати, високите трошоци за живот и иселувањето на населението, за што ја обвинуваат актуелната власт.
Поддршка за протестите пристигнува и од албанската дијаспора, која организира собири во повеќе земји, меѓу кои САД, Велика Британија, Германија, Италија и Канада.
Организаторите најавуваат дека протестите ќе продолжат сè додека не започне процес на политички промени и институционални реформи во Албанија.
…
